Zelenski Putini qatil adlandırıb
Ukrayna prezidenti Volodimir Zelenski CNN-ə müsahibəsində ABŞ prezidenti Donald Trampın Rusiya prezidenti Vladimir Putini “dost” adlandırmasına münasibət bildirib. Zelenskinin sözlərinə görə, Putini necə adlandırmaq Trampın işidir, amma Ukrayna üçün Putin düşmən və qatildir. Zelenski Putinin hər gün və hər gecə insanları öldürdüyünü deyib və onun “dost” kimi təqdim edilməsinin Putinin kifayət qədər təzyiq hiss etmədiyini göstərdiyini bildirib.
Tramp cümə axşamı Çində Si Cinpin və Putinlə üçtərəfli görüşün kənarında Putini “dostu” adlandırıb və illərdir “əla münasibətləri” olduğunu deyib. Cümə günü Ağ Evdə jurnalistlərə o, Putinin müharibəni bitirmək istədiyini bildirib və bu sözlərini təkrarlayıb, lakin Putinin ABŞ-nin dostu olub-olmaması barədə danışa bilməyəcəyini deyib.
Söz davası Rusiyanın Ukraynaya kütləvi hücumları fonunda baş verib. Zelenski cümə günkü hücumu “bu ilin ən böyüyü” adlandırıb; onun məlumatına görə, Rusiya 27-si ballistik olmaqla 110 raket və 400-dən çox dron buraxıb. BBC-nin məlumatına görə, Kiyevdə körpüləri və dəmir yolu stansiyalarını hədəf alan hücumlarda azı 9 nəfər ölüb.
Cümə günü axşam Rusiya qoşunları Krivoy Roq şəhərinin mərkəzinə ballistik raketlərlə zərbə endirib. Dnepropetrovsk vilayət hərbi administrasiyasının rəhbəri Oleksandr Hanjanın məlumatına görə, ilk zərbənin yerinə gələn 20 yaşlı təcili yardım feldşeri və xəstəxanada 7 yaşlı oğlan ölüb. Krivoy Roq Müdafiə Şurasının rəhbəri Oleksandr Vilkul 42 nəfərin yaralandığını, onlardan 27-nin vəziyyətinin ağır olduğunu bildirib. Yaralılar arasında 4, 11, 16 və 17 yaşlı oğlanlar və 9 yaşlı qız var; hakimiyyətin ilkin məlumatına görə, 23 çoxmənzilli bina, xəstəxana və ticarət obyektləri zədələnib.


