Gürcüstanda həbs
Gürcüstanda həbsdə olan müxalifətçi siyasətçi Elene Xoştariya tibbi müayinə üçün klinikaya əlil arabasında aparılıb. Xüsusi Penitensiar Xidmət onun həkim təyinatı ilə Todua Klinikasına göndərildiyini və planlı müayinədən sonra Rustavi yaxınlığındakı qadın cəzaçəkmə müəssisəsinə qaytarıldığını açıqlayıb.
OC Media yazır ki, “Droa” partiyasının lideri olan Xoştariya 2025-ci ilin oktyabrından bəri 18 aylıq cəza çəkir. O, Tbilisi meri Kaxa Kaladzenin seçki qərargahının fasadındakı plakata markerlə “Rusiya arzusu” yazaraq başqasının əmlakına ziyan vurmaqda ittiham olunub. Xoştariya bu addımı oxşar əmələ görə saxlanılan 23 yaşlı Meqi Diasamidzeyə dəstək məqsədilə atdığını bildirmişdi.
Yayılan kadrlardan sonra açıqlama verən Xoştariya əlil arabasından yalnız uzaq məsafələr üçün yararlandığını, əsasən əsa ilə yeridiyini qeyd edib. O, həkimlərin və həbsxana işçilərinin əllərindən gələni etdiyini desə də, səhhətinə dəyən ziyana görə hakim “Gürcü Arzusu” partiyasını günahlandırıb.
“Transparency International Georgia” təşkilatı siyasətçinin onurğasında iltihabi xəstəlik olduğunu açıqlayaraq onun dərhal azad edilməsini tələb edib. Təşkilat verilən cəzanın əmələ uyğun olmadığını və Xoştariyanın siyasi məhbus hesab edildiyini bildirib. Avropa Parlamentinin üzvü Rasa Yukneviçiene də siyasətçinin sağlamlığına görə hakimiyyətin məsuliyyət daşıdığını vurğulayıb.
Hakim partiyanın deputatı və parlament sədrinin birinci müavini Giorgi Volski siyasətçinin səhhətinə qayğı göstərilməli olduğunu desə də, vəziyyəti keçmiş prezident Mixeil Saakaşvilinin vaxtilə əlil arabasında görünməsi ilə müqayisə edib. Volski həmçinin Xoştariyanın ittihamları qəbul edəcəyi təqdirdə razılaşmaya gedə biləcəyini əlavə edib.