İsrail
“Al Jazeera” bir neçə mediaya istinadla yazır ki, Birləşmiş Siyahı və Raam müxalifət bloku ilə birlikdə işləyəcəklərini deyib, amma bu, mütləq hökumətə girmək demək deyil. Prezident İsxak Hersoq bu həftə partiyalarla məsləhətləşmələrə başlayır.
Knessetdə çoxluq üçün 61 yer lazımdır. Netanyahunun bloku 53, Qadi Ayzenkotun bloku 48 yer qazanıb. Ərəb seçicilərin iştirakı təxminən iki dəfə artaraq 80 faizə çatıb, Birləşmiş Siyahı 11, Raam 8 yer alıb. Əhalinin beşdə birini təşkil edən ərəb vətəndaşların partiyalarından yalnız Raam indiyədək hökumətdə olub, 2021-ci ildə qurulan həmin hökumət iki il yaşamayıb.
Netanyahu sübut göstərmədən ərəb partiyalarını seçkidə saxtakarlıqda ittiham edir, “Likud” isə onlarla əməkdaşlığın “İsrail üçün təhlükəli” olduğunu deyir. Bazar günü axşam onlarla adam Ayzenkotun evi qarşısında bu ittifaqa etiraz edib. Ayzenkot da əvvəl ərəb partiyaları ilə koalisiya qurmayacağını demişdi.
Yəhudi və ərəb siyasətçilər arasındakı məsafə işğalla bağlıdır: Birləşmiş Siyahının lideri Yusif Cabarin “The Guardian”a deyib ki, İordan çayının qərb sahilində işğal davam etdikcə hökumətə girə bilməzlər. “Al Jazeera”nın yazdığına görə, 7 oktyabrdan sonra azı iki keçmiş və bir hazırkı fələstinli deputat Qəzzadakı müharibəni və işğalı tənqid etdiyi üçün qısa müddətə saxlanılıb.