Azərbaycan, məhkəmə
“Meydan TV” jurnalistin yaxınlarına istinadla yazır ki, noyabrın 3-də Lənkəran Ağır Cinayətlər Məhkəməsində “Azel TV”nin baş redaktoru Əfqan Sadıqov zala əlləri qandallı, beş konvoyun müşayiəti ilə gətirilib və şüşə kabinə salınıb. Vəkil Nemət Kərimlinin vəsatəti ilə kabindən çıxarılsa da, qandalı açılmayıb. Sadıqov ittihamın yalan olduğunu, jurnalist fəaliyyətinə görə həbs edildiyini deyəndən sonra hakim Ənnağı Məmmədlinin göstərişi ilə yenidən kabinə salınıb.
Vəkil müvəkkili ilə indiyədək görüşə bilmədiyini deyərək iclasın təxirə salınmasını istəyib, məhkəmə əvvəlcə bunu rədd edib. Bundan sonra Sadıqov bunun məhkəmə olmadığını deyib, Prezident İlham Əliyevi və Dövlət Təhlükəsizliyi Xidmətinin rəisi Əli Nağıyevi “quldurlar” adlandırıb, “Rədd olsun diktatura!” və “Siyasi məhbuslara azadlıq!” şüarlarını səsləndirib. Hakim onun zaldan çıxarılmasını əmr edib. Sonra vəkilin vəsatəti təmin olunub, iclas təxirə salınıb. İşdə yeddi nəfər zərərçəkmiş kimi tanınıb.
Sadıqov 2020-ci ildə hədə-qorxu ilə pul tələb etmə ittihamı ilə 7 il cəza alıb, iki il sonra əfv olunub. 2023-cü ilin dekabrında Gürcüstana köçüb. 2024-cü ildə ona qarşı oxşar ittihamla yeni iş açılıb, Avropa İnsan Hüquqları Məhkəməsi ekstradisiyanı qadağan edib. 2026-cı il aprelin 5-də isə Gürcüstan onu polisi təhqir ittihamı ilə Azərbaycana deportasiya edib. Sonra köhnə iş üzrə istintaq bərpa olunub. Məhkəmə və Baş Prokurorluq onun sözlərinə hələlik cavab verməyib.