Aİ, TikTok
Avropa Komissiyası noyabrın 6-da “TikTok”u istifadəçilərin psixi sağlamlığını qorumamaqda ittiham edib. “The Guardian”ın yazdığına görə, ilkin qərarda deyilir ki, platformanın alqoritmi “zərərli ola bilər” və gənc, həssas istifadəçiləri “asanlıqla çıxa bilmədikləri” eyni mövzulu videoların içinə salır.
Komissiyaya görə, Aİ-də 189 milyon istifadəçisi olan platforma bədən görünüşü və ya tənhalıq kimi mövzularda təkrarlanan videoların göstərilməsinin qarşısını almayıb. Bu, narahatlığa, kədərə, qidalanma pozuntularının və psixi problemlərin dərinləşməsinə səbəb ola bilər. Məsələn, istifadəçi qidalanma ilə bağlı videoda “maraqlı deyil” düyməsini basandan sonra da alqoritm ona pəhriz və bədən görünüşü barədə oxşar videolar təklif edib. Komissiyanın texnologiya siyasəti üzrə rəhbəri Henna Virkkunen deyib: “TikTok istifadəçilərin, o cümlədən azyaşlıların rifahını qorumaq üçün səylərini artırmalıdır”.
Şirkətin sözçüsü isə komissiyanın açıqlamalarını “əsaslı şəkildə yanlış” adlandırıb və deyib ki, onlar platformanın quruluşunu təhrif edir. Şirkətə görə, 2026-cı ilin ilk altı ayında Aİ-də 79 milyondan çox istifadəçi arzuolunmaz videoları “maraqlı deyil” düyməsi və açar söz filtrləri ilə süzüb.
İstintaq 2024-cü ilin fevralında Rəqəmsal Xidmətlər Aktı əsasında başlayıb. Komissiya əvvəlcə də “TikTok”un sonsuz lent kimi “asılılıq yaradan dizayn”ına görə Aİ qaydalarını pozduğu qənaətinə gəlmişdi. Şirkət indi istintaq materialları ilə tanış olub müdafiə hazırlaya, cərimədən yayınmaq üçün tövsiyə sistemini dəyişməyə razılaşa bilər. İttiham təsdiqlənsə, “TikTok” qlobal illik dövriyyəsinin 6%-inə qədər cərimələnə bilər.