Krit yolunda 21 ölü
Yunanıstanın Krit adasının cənubunda noyabrın 9-da Mərakeş bayraqlı konteyner gəmisi miqrantları daşıyan qayığı görüb. Sahil Mühafizəsi 12 nəfərin meyitini çıxarıb, 18 nəfəri xilas edib, xəstəxanaya aparılanlardan biri sonradan ölüb. BBC-nin yazdığına görə, sağ qalanların hamısı Sudan vətəndaşıdır, dördü xəstəxanaya aparılıb, aralarında körpə də var.
“Al Jazeera”nın məlumatına görə, şənbə axşamı Kritin cənubunda başqa bir qayıqdan səkkiz meyit çıxarılıb, 28 nəfər xilas edilib, iki nəfər itkin sayılır. Beləliklə, iki hadisədə ən azı 21 nəfər ölüb. Rəsmilər ölüm səbəbinin hələ aydın olmadığını, qayığın güclü külək səbəbindən bir neçə gün dənizdə qaldığını düşündüklərini bildirir. “Reuters”ə danışan sahil mühafizəsi rəsmisi sağ qalanların “soyuqdan titrədiyini” deyib.
Sahil Mühafizəsi bazar ertəsi üç ayrı hadisədə daha 187 nəfəri xilas edib. Avropa İttifaqının sərhəd agentliyi Frontex təyyarə və pilotsuz aparatla qayıqların yerini müəyyən edib.
BMT-nin rəqəmlərinə görə, bu il Yunanıstana 37 mindən çox miqrant gəlib, bu, artıq keçən ilin bütün göstəricisini ötür. Bu il dəniz yolu ilə gələn 86 400 nəfərdən 22 mindən çoxu Kritə çıxıb. Yunanıstan hakimiyyəti noyabrın ilk üç günündə adaya təxminən 1 700 miqrantın gəldiyini bildirib, Heraklion yaxınlığında müvəqqəti yaşayış kompleksi açmağı planlaşdırır.