Kərimli işində şahidlər
Bakı Ağır Cinayətlər Məhkəməsində noyabrın 20-də Azərbaycan Xalq Cəbhəsi Partiyasının (AXCP) sədri Əli Kərimli və partiyanın sədr müavini Məmməd İbrahimin cinayət işi üzrə növbəti proses keçirilib. Proses qapalı keçirildiyindən “Meydan TV” şahidlərin ifadələrini məhkəmədəki mənbələrə istinadən yayıb. Prosesdə politoloq Eldar Namazov, Azərbaycan Demokrat Partiyasının sədri Sərdar Cəlaloğlu və “Yeni Müsavat” qəzetinin baş redaktoru Rauf Arifoğlu şahid qismində dindirilib.
Eldar Namazov 2013-cü ildə Milli Şura yaradılarkən onun məqsədinin hakimiyyət dəyişikliyini dinc yolla dəstəkləmək olduğunu deyib. Onun sözlərinə görə, nə onun, nə də Əli Kərimlinin dövlət çevrilişi məqsədi olub, Kərimli onunla belə bir söhbət aparmayıb. Sərdar Cəlaloğlu da Kərimlinin zorakılığın və dövlət çevrilişinin əleyhinə olduğunu, hakimiyyətin zorla dəyişdirilməsinə qarşı bəyanatlara imza atdığını və heç bir cinayətdə iştirak etmədiyini bildirib.
Rauf Arifoğlu isə Kərimlinin əleyhinə ifadə verib. O, Kərimlinin 2010-2013-cü illərdə onunla hakimiyyətin zorla ələ keçirilməsi və dövlət çevrilişi barədə danışdığını və ondan buna dəstək istədiyini iddia edib. Arifoğlu həmçinin Kərimlinin onu Daxili İşlər Nazirliyindən çıxarkən çəkilmiş fotosu ilə şantaj etdiyini deyib. Kərimlinin vəkilləri ondan bu söhbətlərdən sonra niyə hüquq-mühafizə orqanlarına müraciət etmədiyini soruşub; Arifoğlu bu cür söhbətlərin qanuna zidd olduğundan xəbərsiz olduğunu deyib. “Meydan TV”nin yazdığına görə, onun ifadələri zalda gülüşlə qarşılanıb.
Əli Kərimli Arifoğlunun çıxışından sonra hakimlərə müraciət edərək məhkəməyə “işverən” və “üzəduran” gətirildiyini deyib və Arifoğlunun bir müsahibəsində onu silahla öldürməyə hazır olduğunu söylədiyini iddia edib. Kərimli özü ifadə verməkdən imtina edib. Proses başlamazdan əvvəl polis məhkəməyə gedən yolları nəzarətə götürüb, AXCP fəalları məhkəmə binasının önünə buraxılmayıb.
Əli Kərimli və Məmməd İbrahim 2025-ci il noyabrın 29-da saxlanılıb, dekabrın 1-də Səbail Rayon Məhkəməsi onların barəsində həbs qərarı seçib. Onlara Cinayət Məcəlləsinin 278.1-ci maddəsi ilə hakimiyyəti zorla ələ keçirməyə və konstitusiya quruluşunu zorla dəyişdirməyə yönələn hərəkətlərdə ittiham irəli sürülüb. Hər ikisi ittihamı rədd edir, AXCP isə həbsləri siyasi təzyiq sayır.


