“Əliyevin konstitusiyası” kampaniyası
Ermənistanda bir neçə müxalifət qrupu təklif olunan yeni konstitusiyaya qarşı ictimai kampaniya başladıb. “OC Media” yazır ki, müxalifət layihəni “Əliyevin konstitusiyası” adlandırır və dəyişikliklərin Azərbaycanın tələbi ilə edildiyini iddia edir. Kampaniya Yerevan metrosundan başlayıb, fəallar milli bayraqlar və 1991-ci il müstəqillik referendumunun bülletenlərinin surətləri ilə çıxış edib.
Azərbaycan Müstəqillik Bəyannaməsinə istinad edən preambulada ona qarşı ərazi iddiası olduğunu deyir və konstitusiya dəyişikliyini sülh sazişinin imzalanması üçün şərt qoyur. İki ölkə sazişi 2025-ci ilin avqustunda paraflayıb, amma hələ imzalamayıb. Yeni layihə hələ dərc olunmayıb, hakimiyyət orada Müstəqillik Bəyannaməsinin xatırlanmadığını açıqlayıb. Hökumət konstitusiya islahatının 2018-ci ildən gündəmdə olduğunu, xarici dövlətlərlə müzakirə edilmədiyini deyir.
İyun parlament seçkilərində qalib gələn Paşinyanın “Mülki Müqavilə” partiyasının referendum çağırmaq üçün tələb olunan üçdə iki səsi yoxdur və müxalifətin dəstəyi olmadan qərar qəbul edə bilmir.
“Güclü Ermənistan” fraksiyasının rəhbəri Narek Karapetyan “müstəqilliyin qorunması ilə bağlı maarifləndirmə kampaniyalarına başlayırıq” deyib. “Ermənistan” alyansının deputatı Kristine Vardanyan bunun “sadəcə konstitusiyanın bir maddəsi deyil, müstəqillik və suverenlik məsələsi” olduğunu bildirib. Alyans “Güclü Ermənistan”ın lideri, rusiyalı-erməni milyarder Samvel Karapetyanın həbsindən qısa müddət sonra elan olunub.