Putinlə danışan Avropa lideri
Putinlə danışan Norveç Baş naziri Yonas Qar Styore “Politico” nəşrinə müsahibəsində Trampın Ukrayna üzrə razılaşmanın yaxın olması barədə proqnozuna şübhə ilə yanaşıb. Styore oktyabrın 27-də Finlandiya prezidenti Aleksandr Stubb ilə birlikdə Putinlə 90 dəqiqə telefonla danışıb. Putinin sülh istəyib-istəmədiyi soruşulanda deyib: “Sülh istəsəydi, əvvəldən müharibə olmazdı”. Onun sözlərinə görə, Putin danışıqlar zamanı “peşəkar” və “rasional” olub, amma əsl razılaşmaya açıq olduğunu göstərən əlamət “hələlik” görməyib.
Noyabrın 10-11-də Əbu-Dabidə keçiriləcək danışıqlar barədə Styore “ehtiyatlı olardım” deyib: “Əbu-Dabi bir pillədir, nəticələrindən biri tezliklə davam görüşü olmalıdır”. Onun sözlərinə görə, gündəmdə Qara dənizdə taxıl daşınması üçün atəşkəs, enerji infrastrukturuna zərbələrin dayandırılması, cəbhə xəttinin dondurulması və əsir mübadiləsi ola bilər.
Danimarka və Latviya kimi qonşuların tənqid etdiyi telefon danışığını Styore müdafiə edib: “Etiraf edək, o, təcrid olunmayıb. Moskvaya çatan yeganə səs Vaşinqtondan gəlir. Avropa Moskva ilə danışmadan bu müharibənin bitəcəyini düşünərək aydan-aya yaşamaq, məncə, illüziyadır”. O, Avropanın adından kiminsə danışmalı olduğunu, bu rolda Britaniya, Fransa və Almaniyadan ibarət “üçlüyü” gördüyünü bildirib.
Trampın xüsusi nümayəndəsi Stiv Vitkoffun Putini “humanist” adlandırması soruşulanda Styore “bu, mənim lüğətimdə olmazdı” deyib. ABŞ-yə etibar edib-etmədiyi sualına “ABŞ-nin bu müharibəni bitirmək yolunu axtardığına inanıram” cavabını verib. Baş nazir NATO-nun Avropadakı mövqeyinin danışıqlarda sövdələşmə mövzusu olmamalı olduğunu da vurğulayıb: “Avropanın təhlükəsizlik quruluşu ilə bağlı məsələlərə müharibə bitdikdən sonra baxılmalıdır. NATO-nun harada olub-olmayacağına Rusiya qərar verməz”.