Rusiya-Ukrayna müharibəsi
Latviyanın xarici işlər naziri Bayba Braje X-də yazıb ki, ölkəsi “Ukraynada mülki əhaliyə dəhşətli hücumlara görə” BMT Təhlükəsizlik Şurasının təcili iclasını çağırıb. Onun sözlərinə görə, bu hücumlar arasında Kamışevaxadakı yardım paylama mərkəzinə zərbə də var, orada ən azı 26 mülki şəxs ölüb. Ukrayna tərəfi sonradan ölənlərin sayının 31-ə çatdığını bildirib. Latviya bu il Şuranın qeyri-daimi üzvüdür, Rusiya isə veto hüququ olan daimi üzvüdür. İclasın vaxtı açıqlanmayıb.
Noyabrın 2-də zərbə Zaporojye vilayətinin cəbhəyə yaxın Kamışevaxa qəsəbəsindəki məktəbə endirilib. Volodimir Zelenskinin sözlərinə görə, cəbhəyə yaxın olduğu üçün dərs keçirilməyən bina sığınacaq və sakinlərin hər bazar ertəsi yardım aldığı yer kimi işləyirdi: “Rusiyalılar insanlar gələn kimi ilk zərbəni endirdilər, bir neçə aviabomba. Sonra ikinci zərbə gəldi, bu dəfə sığınacağa”. O, Rusiyanın bu görüşlərdən xəbərsiz ola bilməyəcəyini deyir.
Ukrayna Dövlət Fövqəladə Hallar Xidmətinə görə, ölənlər arasında iki xilasedici və dörd polis var. Zaporojye Şəhər Şurasının katibi Reqina Xarçenko 27 nəfərin itkin olduğunu bildirmişdi, “France 24” sonradan 48 nəfərin itkin sayıldığını yazıb, axtarış davam edir. Rusiya hərbçiləri zərbə barədə hələlik açıqlama verməyib.
Zərbə Melaniya Trampın vasitəçiliyi ilə Xerson vilayətinin işğal altındakı Oleşki şəhərində oktyabrın 27-dən noyabrın 1-dək davam edən atəşkəsdən bir gün sonra olub. Zelenski deyir ki, bu, Rusiyanın “tamamilə əks siqnal” verməsidir. Saatlar sonra ABŞ Rusiya və Ukrayna ilə Əbu-Dabidə noyabrın 10-11-də danışıqlar elan edib.