Tanzaniya
Tanzaniyanın əsas müxalifət partiyası “Çadema”nın lideri Tundu Lissu Dar-es-Salamdakı Ali Məhkəmədə təxribata çağırışda təqsirli bilinib. BBC-nin yazdığına görə, üç hakimdən ibarət kollegiya onu dövlətə xəyanət ittihamından bəraət qazandırıb, prokurorluğun bu ittihamın əsas elementini sübut edə bilmədiyini bildirib. Cəza hələ açıqlanmayıb.
58 yaşlı Lissu 2025-ci ilin aprelindən həbsdədir. Ona “İslahat yoxdursa, seçki də yoxdur” şüarı ilə seçki sisteminin dəyişdirilməsini tələb edən kampaniya zamanı dediyi sözlərə görə ittiham verilib. Prokurorluq iddia edib ki, onun çıxışları xalqı seçkini pozmağa təhrik edib. Lissu ittihamları həmişə rədd edib və siyasi motivli adlandırıb. O, Apellyasiya Məhkəməsinə şikayət edə bilər.
Tanzaniyada dövlətə xəyanət ən ağır cinayətlərdəndir və ölüm cəzası nəzərdə tutur. Prezident Samia Suluhu Həsən 2025-ci ilin oktyabrında seçkidə səslərin 98%-ni alıb. Müxalifət bu nəticəni demokratiyanın “ələ salınması” adlandırıb, çünki iki əsas rəqibi, o cümlədən Lissu seçkidən kənarda qalmışdı.