İsrail
İsrailin Mərkəzi Seçki Komissiyasının sədri Noam Solberq deyib ki, xarici müdaxilə şübhələri sübut olunsa belə, oktyabrın 27-də keçirilən seçkinin nəticələri qüvvədə qalacaq. O, bu bəyanatı Şin-Bet xidmətinin rəhbəri və baş prokurorla birlikdə yayımlanan videoda verib.
Baş nazir Benyamin Netanyahunun “Likud” partiyası sübut göstərmədən iddia edir ki, ərəb partiyaları seçkini “oğurlayıb” və bunun üçün Qətərdən pul alıb. Qətər bu iddianı dezinformasiya kampaniyası adlandırıb. Müxalifət lideri Qadi Ayzenkot isə Netanyahunu nəticələri nüfuzdan salmaq üçün təşkil olunmuş kampaniya aparmaqda ittiham edir.
Polis seçkidən əvvəl səsləri satın almaq şübhəsi ilə saxladığı, “Raam” partiyası ilə əlaqələndirdiyi üç fəaldan ikisini buraxıb. Partiyanın lideri Mənsur Abbas saxlanmaları qeyri-demokratik adlandırıb.
120 yerlik Knessetdə Netanyahunun bloku 53, Ayzenkotun bloku 48 yer qazanıb, heç biri təkbaşına hökumət qura bilmir. Üç ərəb partiyası isə rekord sayda, 19 yer alıb. Onların Ayzenkotla birləşməsi 67 səslik çoxluq yaradır, amma İsrailin siyasi mühitində ərəb partiyaları ilə ittifaq hələ də çətin qəbul olunur.
Ən böyük ərəb koalisiyası olan Birləşmiş Siyahının lideri Yusif Cabarin “The Guardian”a deyib ki, hökumətə daxil olmayacaqlar, amma Netanyahunu devirmək üçün kənardan dəstək verməyi düşünürlər: “Bu, həqiqətən tarixi andır”. Cabarin Netanyahunun hakimiyyəti saxlamaq üçün Trampla birlikdə İrana qarşı müharibəni bərpa edə biləcəyindən də ehtiyat etdiyini bildirib.
Nəticələr bu həftə rəsmən təsdiqlənməlidir. Bundan sonra Prezident İsxak Hersoq hökuməti qurmaq üçün namizəd müəyyən edəcək.