İsrail-Fələstin
Qubernator Xalid Dudin bildirib ki, ərazi Fələstin təhlükəsizlik qüvvələrinin nəzarətinə keçib və evlərini tərk etmiş ailələr İordan çayının qərb sahilindəki işğal olunmuş şəhərə qayıda bilər. Meri Yusif əl-Cabari isə geri çəkilmə barədə bələdiyyəyə səhər saat 6-da rəsmən məlumat verildiyini deyib.
Qubernatorluğun məlumatına görə, mühasirə zamanı 3300-dən çox fələstinli köçkün düşüb və ya zərər çəkib, 15 ev və digər tikili dağıdılıb. Al Jazeera müxbiri 537 ailənin köçkün düşdüyünü, azı 317 dükanın bağlandığını, nəzarət-buraxılış məntəqələrinin isə 800 min nəfərlik vilayətə təsir etdiyini bildirir. Mediada bu hadisə nəticəsində köçkün düşənlərin sayı təxminən 5 min nəfər kimi göstərilib.
Mer deyir ki, şəhərə giriş və çıxış tam bağlı olub, iqtisadi, təhsil və səhiyyə həyatı dayanıb, beş universitet işləməyib. Evlərinə qayıdan sakinlər əsgərlərin hərbi post kimi istifadə etdiyi evlərin içini dağıtdığını, pul və əşyaların götürüldüyünü deyir.
İsrail ordusu şəhəri oktyabrın 23-də, iki fələstinlinin açdığı atəşdə iki İsrail əsgəri öldürüləndən və üçü yaralanandan sonra bağlayıb. Atəş açanları İsrail qüvvələri sonradan öldürüb, onların evlərini də dağıdıb.
Fələstinli tədqiqatçı İbrahim Rabaya əməliyyatı “İsrailin kollektiv cəza sisteminin bir hissəsi” adlandırıb və deyib ki, ilk dəfə hücum edənlərin ailələri və ya qaçqın düşərgələri yox, bütöv şəhər məhəllələri hədəf alınıb. İsrail mövzusu üzrə ekspert Məhəmməd Hilles isə bunu Netanyahunun seçkidən əvvəl səs toplamaq cəhdi kimi qiymətləndirib.
İordan çayının qərb sahili 1967-ci ildən İsrailin işğalı altındadır. “Oxfam” BMT-nin humanitar ofisinin (OCHA) məlumatına istinadla bildirir ki, 2023-2025-ci illərdə burada 1244 fələstinli öldürülüb, onlardan 268-i uşaqdır. Bu, əvvəlki 17 ildəkindən çoxdur.