Azərbaycan-İran
55 Azərbaycan qeyri-hökumət təşkilatı İran prezidenti Məsud Pezeşkiana açıq məktub ünvanlayıb və İrandakı etnik azərbaycanlıların ana dilində təhsil hüququnu təmin etmək üçün “tarixi addımlar” atmağa çağırıb. “OC Media”nın yazdığına görə, QHT-lər ana dilində təhsilin inkişafına dəstək verməyə hazır olduqlarını da bildiriblər.
Məktub İranın elm naziri Hüseyn Siməi Sərrafın hicab taxan azərbaycanlı qızları İran universitetlərində oxumağa dəvət etməsindən sonra yaranan diplomatik mübahisənin fonunda yazılıb. Azərbaycan Təhsil Nazirliyi Tehranı daxili işlərə qarışmaqda ittiham etmiş və İran rəsmilərini ölkədəki etnik azərbaycanlıların təhsil hüquqları ilə məşğul olmağa çağırmışdı.
QHT nümayəndələri noyabrın 2-də məktubu İranın Bakıdakı səfirliyinə aparıblar. Noyabrın 3-də səfirlik APA-ya göndərdiyi məktubda müraciəti rəsmi qəbul etmədiyini bildirib. Səfirliyə görə, inzibati qaydalara əsasən “naməlum şəxslərin, kənar və etibarsız göndərənlərin” məktubları qeydə alınmır, yandırılır və ya doğranır, məktub isə “dəyərsiz”dir.
Məktubu imzalayanlardan biri, Milli QHT Forumunun idarə heyətinin üzvü Zaur İbrahimli səfirliyin mövqeyini məsuliyyətdən yayınmaq və diqqəti məktubun mahiyyətindən yayındırmaq cəhdi adlandırıb. Məktubu səfirliyə şəxsən təhvil verən “İslahatçı Qadınlar və İnnovasiyalar” QHT-sinin sədri Vüsalə Hüseynli də səfirliyi qeyri-peşəkarlıqda və təxribat xarakterli açıqlamalar verməkdə ittiham edib.