ABŞ-Ukrayna
ABŞ Konqresində demokratlar Ukraynaya təxminən 15 milyard dollarlıq yeni təhlükəsizlik yardımı paketini müzakirə edir. Bunu “Financial Times” qəzeti Demokrat Partiyasının nümayəndələrinə istinadla yazır. Paketin həcmini qəzetə Nümayəndələr Palatasının xarici əlaqələr komitəsinin bir əməkdaşı deyib, rəqəm hələ müzakirə olunur.
Demokratlar aralıq seçkilərdə qələbədən sonra 2027-ci ilin yanvarından Konqresin hər iki palatasına nəzarət edəcək. Qəzetin yazdığına görə, onlar büdcə və nəzarət səlahiyyətlərindən Ukraynaya dəstəyi gücləndirmək və Rusiyaya sanksiya təzyiqini artırmaq üçün istifadə etməyi planlaşdırırlar. Kiyevə dəstək verən qanunvericilər indiki Konqresin müddəti bitənədək, xüsusilə Rusiyanın sistemli hücumlarına məruz qalan Ukrayna enerji sektoru üçün əlavə yardım almağa çalışır. Bunun üçün illik müdafiə büdcəsi qanunu (NDAA) da istifadə oluna bilər.
“Financial Times”ın yazdığına görə, demokratlar Rusiyaya qarşı sanksiya qanunvericiliyini də yenidən nəzərdən keçirmək istəyir: Donald Tramp oktyabrda Vladimir Putinlə Rusiya dizel yanacağının dünya bazarlarına verilməsi barədə razılaşmadan qısa müddət sonra sanksiyalardan istisnalar verib. Demokratlar Ukraynanın istifadə etdiyi “Starlink” peyk şəbəkəsinə də nəzarəti gücləndirmək istəyir, qəzetə görə, oktyabrda onun xidməti bilinməyən səbəbdən yavaşlayıb. Qanunvericilər Trampın xüsusi nümayəndələri Stiv Uitkoff və Cared Kuşnerin biznes maraqlarını da araşdırmağı nəzərdən keçirir.
Ağ Ev qəzetə şərhində Trampın və onun nümayəndələrinin Ukraynadakı müharibəni bitirməyə fokuslandığını, Konqresin qanuni nəzarət sorğularına cavab verməyə hazır olduqlarını bildirib. Prezidentin mümkün vetosunu aradan qaldırmaq üçün demokratlara hər iki palatada üçdə iki səs lazımdır, ona görə də onlar respublikaçıların dəstəyini axtaracaq. Zelenski bundan əvvəl Ukraynanın əvvəlki razılaşmalarla nəzərdə tutulan 16 milyard dollarlıq ABŞ yardımını almadığını demişdi.