Almaniya-Rusiya
Berlin hava limanında Rusiya vətəndaşlarını “könüllü” söhbətlərə dəvət edib Rusiyadakı vəziyyət, səfərbərlik və qiymət artımı barədə soruşmağa başlayıblar. Bunu müstəqil Rusiya nəşri “Xolod”a Berlinə İstanbul üzərindən uçan iki rusiyalı qadın danışıb.
Nəşrin yazdığına görə, birinci hadisə oktyabrın sonunda olub. Ailəsinin yanına qonaq gələn qadına pasport nəzarətindən sonra bir neçə suala cavab verməyi təklif ediblər. O, alman və ingilis dillərini bilmədiyi üçün hava limanının işçiləri əvvəlcə telefonla oğlundan razılıq alıblar. Sonra qadını ayrıca otağa aparıblar, mülki geyimli əməkdaşlar təxminən bir saat tərcüməçi vasitəsilə ona Rusiyadakı vəziyyət, səfərbərlik, inflyasiya və baş verənlərə münasibəti barədə suallar veriblər. Qadın söhbətdən imtina edə biləcəyini yalnız söhbət zamanı öyrənib.
İkinci hadisə noyabrın 4-də olub. Almaniyada daimi yaşayış icazəsi ilə yaşayan Rusiya vətəndaşı deyib ki, pasport nəzarətindən sonra onun sənədlərini alıb polisə veriblər, sonra mülki geyimli bir kişi gəlib onu ardınca getməyə çağırıb: “Rusiya vətəndaşlığı olan insanlarla müsahibə edirik”. Kişi özünü təqdim etməyib. Qadın söhbətin könüllü olduğunu öyrənəndə imtina edib, sənədlərini qaytarıb onu buraxıblar.
Berlin hava limanının rəhbərliyi “Xolod”a əcnəbi vətəndaşların sorğusunun əməkdaşlarının vəzifəsinə daxil olmadığını deyib və polisə müraciət etməyi tövsiyə edib. Almaniya polisi nəşrin sorğusuna cavab verməyib. Almaniya hakimiyyəti sentyabrda Rusiya vətəndaşlarının ölkəyə girişinə nəzarəti sərtləşdirəcəyini açıqlayıb. Bu qərar Leypsiq hava limanında Ukraynanın yük təyyarəsinə qarşı təxribatdan sonra verilib, Berlin bu təxribatda Moskvanı günahlandırıb.