Kino xəbərləri
Rejissor Denis Villeneuve-ün “Dune: Part Three” filminin yekun tam treyleri yayımlanıb. Frank Herbertin “Dune: Messiah” elmi-fantastik romanı əsasında çəkilən ekran əsərinin nümayişinə bir neçə həftə qalıb.
Warner Bros. xəbər verir ki, üçüncü film “Dune: Part Two” filminin sonunda Pol Atreydesin (Timothée Chalamet) İmperiyaya qarşı başlatdığı müqəddəs müharibədən təxminən 20 il sonrakı dövrü əhatə edir. Mümkün gələcəkləri görə bilən Pol bu yolu ən az zərərli seçim kimi qəbul etsə də, bu addım qalaktika boyu kütləvi ölüm və dağıntılara səbəb olub.
Warner Bros. qeyd edir ki, Pol, yəni Muad’Dib təxminən 20 ildir ki, amansız bir diktatora çevrilib. Nəticədə o, keçmiş sevgilisi Çani (Zendaya) də daxil olmaqla çoxlu düşmən qazanıb. İmperatorluğun çökməsi ilə bağlı baxışların təqib etdiyi Pol yeni təhlükələr və qiyam hazırlıqları fonunda hakimiyyətin bədəli ilə üzləşmək məcburiyyətində qalır.
Denis Villeneuve Empire jurnalına müsahibəsində bu filmi ilk iki filmlik “diptix” üçün “mürəkkəb bir epiloq” kimi xarakterizə edib. Baş rol ifaçısı Timothée Chalamet də bu fikri dəstəkləyərək üçüncü filmin müəyyən mənada müstəqil bir film olduğunu deyib.
Frank Herbert romanı ilk kitabı oxuyub Pol Atreydesi qalaktikanı xilas edəcək bir qəhrəman hesab edən oxucular üçün bir növ düzəliş kimi qələmə alıb və onu dəhşət simvoluna çevirib.