Fransada şagird etirazları
Fransada təhsil şəraitinin pisləşməsinə qarşı lisey şagirdlərinin etirazları ölkənin müxtəlif şəhərlərinə yayılıb. Şagirdlər müəllim çatışmazlığına, siniflərin həddən artıq dolu olmasına, məktəb binalarının yararsız vəziyyətinə və təhsilə kifayət qədər vəsait ayrılmamasına etiraz edirlər.
Sentyabrda Paris ətrafında başlayan aksiyalar zamanı şagirdlər bir sıra liseylərin girişlərini bağlayaraq dərslərin keçirilməsinə mane olublar. Etirazçılar məktəblərə əlavə maliyyə ayrılmasını, müəllim vakansiyalarının doldurulmasını və tədris şəraitinin yaxşılaşdırılmasını tələb edirlər.
Şagirdlərin şikayətləri arasında dərsə gəlməyən müəllimlərin əvəzlənməməsi və gündəlik dərs yükünün çoxluğu da var. Bəzi məktəblərdə şagirdlər sanitar qovşaqların işləmədiyini, sinif otaqlarının təmirə ehtiyacı olduğunu bildirirlər.
Aksiyaların genişlənməsi fonunda bir sıra şəhərlərdə polislə qarşıdurmalar və məktəb binalarına ziyan vurulması halları qeydə alınıb.
Fransanın təhsil naziri Eduar Jeffre oktyabrın 4-də bildirib ki, təhlükəsizliklə bağlı problemlərə görə oktyabrın 5-də 400-500 təhsil müəssisəsində dərslər tam və ya qismən dayandırılacaq. Nazir tədrisin mərhələli şəkildə bərpasının nəzərdə tutulduğunu deyib.
Şagird təşkilatları oktyabrın 6-na yeni ümummilli etiraz çağırışı ediblər. Bir sıra təhsil həmkarlar ittifaqları da aksiyaları dəstəkləyir.
Fransada şagird etirazları