Kino xəbərləri
Rejissor Ken Russellin 1971-ci ildə çəkdiyi və uzun illər senzura qadağaları ilə üzləşən “The Devils” filmi bərpa edilmiş tam variantında yenidən nümayişə buraxılıb.
The Guardian yazır ki, vaxtilə ədəbsizlik ittihamı ilə yasaqlanan bu ekran əsəri Oliver Reed və Vanessa Redgravenin ifaları vasitəsilə hakimiyyət zorakılığını nümayiş etdirir. Film Aldous Huxleynin “Loudun şeytanları” əsəri və John Whitingin “The Devils” pyesi əsasında, real kütləvi isteriya hadisəsinə söykənərək hazırlanıb.
The Guardian qeyd edir ki, ekran işində 17-ci əsr Fransada cadugərlikdə suçlanan keşiş Urbain Grandierin (Oliver Reed) taleyi əks olunub. Loudun şəhərinin müstəqilliyini qorumağa çalışan keşiş şəhərin hüqenotlar və protestantlar üçün sığınacağa çevrilməsindən ehtiyatlanan Kardinal Richelieu (Christopher Logue) və Katolik Kilsəsinin qəzəbinə tuş gəlir.
Nəşrin təhlilinə görə, monastır rəhbəri bacı Jeanne Des Anges (Vanessa Redgrave) Grandierə bəslədiyi ehtirasın qarşılıqsız qalması və keşişin Madeline De Brou (Gemma Jones) ilə evlənməsindən sonra onun haqqında şeytani iddialar yayır. Dövlət nümayəndələri isə bu hekayədən yapışaraq kütləvi isteriyanı qızışdırır.
The Guardian vurğulayır ki, film həm də hakimiyyətin narazı enerjiləri boğmaq və təzyiqlərə bəraət qazandırmaq üçün əxlaqi panikadan necə istifadə etməsindən bəhs edir. Əsərdə Peter Maxwell Daviesin bəstələdiyi musiqilər və Derek Jarmanın hazırladığı qeyri-adi səhnə dizaynları gərgin atmosferi tamamlayır.