ABŞ səmasında 4 saatlıq dayanma
Nəqliyyat naziri Şon Daffi noyabrın 14-də Vaşinqtonda mətbuat konfransında bildirib ki, nasazlığa ucqar bir məntəqədə marşrutlaşdırıcının mis kabeldən fiber-optikaya keçirilməsi zamanı aparılan texniki iş səbəb ola bilər. Onun sözlərinə görə, “podratçının səhvi və ya nasaz avadanlıq” üzündən həmin marşrutlaşdırıcı hava trafikinə nəzarət sistemindəki digərlərini sorğularla doldurub: “Hər dörd-beş saniyədə 1 000 bağlantı cəhdi olurdu”. Nazirlik işi görən podratçının FAA-nın rabitə sistemini yeniləyən “L3Harris” şirkəti olduğunu açıqlayıb. Daffi deyib ki, səhvin quraşdırıcıda, yoxsa nasaz marşrutlaşdırıcıda olduğu hələ müəyyən edilməyib, amma “günahkarlar məsuliyyətə cəlb olunacaq”.
FAA-nın rəhbəri Brayan Bedford kiberhücum və ya süni intellektlə bağlı hər hansı izin olmadığını deyib. Onun sözlərinə görə, 12 min reysin ləğvi səbəbindən ekipajlar və təyyarələr yerlərindən kənarda qalıb, uçuş cədvəlinin bazar gününün sonuna qədər tam bərpa olunması gözlənilir. “Al Jazeera” “L3Harris”dən şərh istədiyini, hələlik cavab almadığını yazır.
ABŞ-nin Federal Aviasiya Administrasiyası (FAA) noyabrın 13-də ölkənin bütün hava limanlarından uçuşları dayandırıb. Qərar ABŞ-nin şərq vaxtı ilə 15:54-də, ölkə üzərindən keçən uçuşları idarə edən hava marşrutu nəzarət mərkəzlərində rabitə nasazlığı yarananda verilib. Nəqliyyat naziri Şon Daffinin sözlərinə görə, hava məkanı 4 saatdan çox sonra, yerli vaxtla 20:15-də yenidən açılıb.
Daffi bildirib ki, nasazlığa məlumatla həddindən artıq yüklənən və sıradan çıxan kommutator və marşrutlaşdırıcılar səbəb olub, rabitə və radarlar tam itməyib. Daxili Təhlükəsizlik naziri Markueyn Mullin isə kiberhücum olmadığını, sərnişinlərin təhlükədə olmadığını deyib: “Hamı təhlükəsizdir”. O, hadisənin “ikinci 11 sentyabr” olmadığını vurğulayıb.
“Al Jazeera”nin yazdığına görə, bu, 2001-ci il 11 sentyabr hücumlarından sonra ABŞ-də bütün uçuşların ikinci dəfə dayandırılmasıdır. Havada olan təyyarələrə təyinat yerinə enmək icazəsi verilib, beynəlxalq reyslər ayrı-ayrılıqda həll olunub. “FlightRadar24” saytına görə, cümə günü 4 700-dən çox reys ləğv edilib, 10 min reys gecikib, şənbə üçün də 700 reys ləğv olunub. Aviasiya analitikası ilə məşğul olan “Cirium” şirkəti ən azı 827 təyyarənin yolunu dəyişdiyini bildirib, onların 670-i qalxdığı hava limanına qayıdıb.
Daffi uçuşların tədricən bərpa olunacağını, bunun pilot və bortbələdçilərin olmasından asılı olduğunu deyib. Nazir hava trafikinə nəzarət sisteminin yenilənməsi üçün 50 milyard dollar ayrılmasını istəyib. Ekspertlər isə ehtiyat sistemlərin niyə dərhal işə düşmədiyini soruşurlar. Hadisə ABŞ-də ən sıx səyahət dövrü olan Şükran günü bayramına iki həftədən az qalmış baş verib.