Tesla
Tesla şirkətinin rəhbəri İlon Mask noyabrın 6-da X-də Cybertruck elektrik pikapının istehsalının dayandırılacağını açıqlayıb: “Tesla Cybercab istehsalının artırılmasına yer açmaq üçün Texasdakı Gigafactory zavodunda Cybertruck istehsalını təxminən gələn ilin ortasında dayandıracaq”. Cybercab şirkətin sükansız, sürücüsüz taksisidir.
Polad gövdəli pikap 2019-cu ildə təqdim olunub, çatdırılmalar 2023-cü ilin sonunda başlayıb. Mask ildə 200 min Cybertruck satmağı hədəfləyirdi, amma bu rəqəmə heç yaxınlaşmayıb. Tesla Cybertruck satışlarını ayrıca açıqlamır, 2026-cı ilin üçüncü rübündə Cybertruck daxil olan “digər modellər”dən cəmi 8 300 ədəd çatdırıb. Müqayisə üçün, Model 3 və Model Y-dən eyni dövrdə 478 min ədəd çatdırılıb. Pikap təhlükəsizlik standartlarına cavab vermədiyi üçün Avropada satışa çıxmayıb.
Mask 2023-cü ildə də etiraf etmişdi: “Cybertruck ilə öz qəbrimizi özümüz qazdıq”. Şirkət bu il Model S və Model X istehsalını da dayandırıb və diqqəti robotlara, süni intellektə və sürücüsüz taksilərə yönəldir. Texasdakı zavodda “Optimus” humanoid robotu da istehsal olunacaq.
Qərar Mask üçün çətin həftəyə təsadüf edib. “The Guardian”ın yazdığına görə, onun 446 milyon dollar ianə verdiyi respublikaçı namizədlər ABŞ-də aralıq seçkilərdə uduzub. Nəticələr bəlli olandan sonra Maskın sərvətinin kağız üzərindəki dəyəri 113 milyard dollar azalıb, Tesla səhmləri isə cümə axşamı 11% ucuzlaşıb.