Almaniya-Ukrayna
Almaniyanın müdafiə naziri Boris Pistorius “Funke” media qrupuna müsahibəsində deyib ki, Almaniya Ukraynaya əlavə “Patriot” hava hücumundan müdafiə sistemləri və onlar üçün raketlər verə bilməz. Onun sözlərinə görə, Berlin Kiyevə artıq bir neçə “Patriot” kompleksi və xeyli sayda idarəolunan raket verib, sonrakı tədarüklər isə Almaniyanın öz müdafiəsində boşluqlar yarada bilər. Pistorius deyib ki, indi verilən hər şeyin yerini müvəqqəti olaraq doldurmaq mümkün olmayacaq, buna isə yol vermək olmaz.
Nazir əlavə edib ki, digər ölkələrin Ukraynaya hərbi yardımı Almaniyanın töhfəsindən xeyli azdır, ona görə Berlin müttəfiqlərdən daha çox səy gözləyir.
Pistorius oxşar fikri bu ilin yanvarında da demişdi: o vaxt Almaniyanın öz ehtiyatlarının, təlim və texniki xidmət imkanlarının həddində olduğunu bildirmişdi. 2025-ci ildə “Financial Times”a müsahibəsində isə Almaniyanın bir vaxtlar malik olduğu 12 “Patriot” sistemindən üçünü Ukraynaya verdiyini demişdi. Sentyabrda Almaniya Bundesverin ehtiyatlarından Ukraynaya əlavə “Patriot” raketləri verəcəyini açıqlamışdı.
Açıqlama Rusiyanın noyabrın 7-nə keçən gecə Kiyevə və Ukraynanın digər bölgələrinə 172 dron və 36 ballistik raketlə hücumundan sonra gəlir. Ukrayna prezidenti Volodimir Zelenski hücumdan sonra ABŞ-ni Ukraynaya dəstəyi artırmağa çağırıb. “Patriot” ballistik raketləri vura bilən azsaylı sistemlərdəndir.