Moskvanın 2021 tələbləri yenidən
Rusiya noyabrın 10-11-də Əbu-Dabidə Ukrayna və ABŞ ilə danışıqlarda NATO-dan qüvvələrini və bazalarını 1997-ci il sərhədlərinə çəkməyi, Ukraynaya silah verməyi dayandırmağı və Fransa ilə Böyük Britaniyanın nüvə silahlarını digər Avropa ölkələrini qorumaq üçün işlətməməsini tələb edib. Bu barədə “The New York Times” qəzeti mənbələrə və danışıqlarda iştirak edənlərin yaydığı qeyri-rəsmi sənədə istinadla yazır, “Deutsche Welle” də xəbəri yayıb.
Qəzetin iki mənbəsinə görə, sənəd Rusiyanın ilkin mövqeyidir və rus rəsmiləri danışıqlarda Vladimir Putinin hələ də “çeviklik göstərə biləcəyini” ima ediblər. Sənəd rəsmi blankda yazılmayıb və imzası yoxdur, Rusiyanın baxışını qeyri-rəsmi şəkildə çatdırmaq üçündür.
Sənəddə Rusiya 2021-ci ilin dekabrında, Ukraynaya genişmiqyaslı hücumdan iki ay əvvəl irəli sürdüyü tələbləri təkrarlayır: NATO genişlənməməli, Ukraynada, Şərqi Avropada, Cənubi Qafqazda və Mərkəzi Asiyada “hər hansı hərbi fəaliyyətdən” imtina etməlidir. 1997-ci il sərhədlərinə qayıdış NATO-nun Mərkəzi və Şərqi Avropaya genişlənməsindən əvvəlki vəziyyət deməkdir, “The New York Times” yazır ki, bu, Polşa, Estoniya, Latviya və Litvanın özünü müdafiə imkanını zəiflədər.
Nüvə tələbi isə genişləndirilib. 2021-ci ildə Rusiya NATO-nun ABŞ nüvə silahlarının Avropadakı müttəfiqlərlə “birgə istifadəsi” razılaşmalarından imtina etməsini istəyirdi, indi Fransa və Britaniyadan da öz nüvə silahlarını digər Avropa ölkələrinin müdafiəsi üçün işlətməməyi tələb edir. Sənəddə Ukraynaya “hər növ Qərb silahı, hərbi texnikası və məhsulu” verilməsinin dayandırılması tələbi də var. Rusiya Ukraynanın Avropa İttifaqına üzvlüyünü yalnız Kiyev ittifaqın ümumi müdafiə siyasətində iştirak etməzsə qəbul edəcəyini bildirir.
Əbu-Dabi danışıqlarında ABŞ prezidentinin xüsusi nümayəndəsi Stiv Vitkoffun sözlərinə görə, müharibədən sonrakı təhlükəsizlik, gərginliyin azaldılması və humanitar təşəbbüslər müzakirə olunub. Avropa ölkələri üçtərəfli görüşdə təmsil olunmayıb, amma əsas danışıqlardan əvvəl Kiyev və Vaşinqtonun nümayəndə heyətləri ilə məsləhətləşmələr aparıblar.