Oleşki atəşkəsində rotasiya iddiası
Ukrayna prezidenti Volodimir Zelenski noyabrın 8-də Telegram kanalında yazıb ki, “Oleşkidəki humanitar əməliyyat pərdəsi altında Rusiya ordusu sol sahildə canlı qüvvə və texnikanın əhəmiyyətli rotasiyasını həyata keçirib”. Onun sözlərinə görə, Rusiya şəhərə və ətraf əraziyə əlavə qoşun da gətirib. Ukrayna Baş Qərargahı bundan əvvəl Rusiya qoşunlarının humanitar fasilədən mövqelərini möhkəmləndirmək üçün istifadə etdiyini bildirmişdi.
Rusiya tərəfi isə Kiyevin də fasilədən “müvafiq yenidən qruplaşma” üçün istifadə etdiyini iddia edib. Kreml sözçüsü Dmitri Peskov deyib: “Belə vəziyyətlərdə bu, tamamilə adi təcrübədir”.
Oleşki Xerson vilayətində, Dnepr çayının sol sahilində yerləşir və müharibənin əvvəlindən Rusiyanın işğalı altındadır. “Meduza”nın yazdığına görə, payızda Oleşkidəki vəziyyət humanitar fəlakət həddinə çatıb: sakinlər ərzaqsız, işıqsız və dərmansız qalıb, şəhərdən çıxmaq çətin olub.
Oleşkidəki sakinlərə yardım çatdırmaq və çıxmaq istəyənləri təxliyə etmək üçün Rusiya və Ukrayna oktyabrın 27-dən noyabrın 1-dək bu ərazidə döyüşləri dayandırıb. Bu, 2022-ci ildən bəri ən uzun səssizlik rejimi olub. Əməliyyatı iki ölkənin ombudsmanları ABŞ-nin birinci xanımı Melaniya Trampın vasitəçiliyi ilə razılaşdırıb. Zelenskinin bu sözləri Rusiya, ABŞ və Ukrayna nümayəndələrinin noyabrın 10-11-də Əbu-Dabidə görüşündən bir neçə gün əvvəl səslənib.