SBU-da kadr qərarları gözlənilir
Ukrayna prezidenti Volodimir Zelenski noyabrın 7-də Təhlükəsizlik Xidmətində, yəni SBU-da yaxın vaxtlarda yeni kadr qərarları veriləcəyini açıqlayıb. “DW”nin yazdığına görə, o, gündəlik videomüraciətində “bu həftənin açıq-aşkar xoşagəlməz, biabırçı, tamamilə yolverilməz şeylər gətirdiyini” deyib və istintaqın bütün halları üzə çıxarmalı olduğunu bildirib.
Zelenski bütün SBU əməkdaşları üçün gəlir və əmlak bəyannaməsinin bərpası barədə qanun layihəsini də təsdiqləyib. Onun sözlərinə görə, bu, əməkdaşların həyat tərzini yoxlamağa və onları digər dövlət qurumlarının işçiləri ilə eyni əsasda məsuliyyətə cəlb etməyə imkan verəcək. Prezident Ali Radanı qanunu tez qəbul etməyə çağırıb.
Noyabrın 4-də Ukraynanın Milli Antikorrupsiya Bürosu (NABU) və İxtisaslaşdırılmış Antikorrupsiya Prokurorluğu “Karfagen” əməliyyatı çərçivəsində SBU və polisin yüksək vəzifəli rəsmilərinin yanında axtarış aparıb. Beş nəfərə cinayətkar təşkilatın fəaliyyətində iştirak ittihamı irəli sürülüb. İstintaqın iddiasına görə, beynəlxalq “Ximprom” narkokartelinə bağlı qruplaşma 50-dən çox fırıldaqçı zəng mərkəzinə və bir neçə qanunsuz qumar müəssisəsinə nəzarət edib, saxta siqaret və saxta avro istehsalı ilə məşğul olub, adam oğurluğu və zorakılığa əl atıb. Qurumlar qruplaşmanın himayə üçün SBU, polis və prokurorluq əməkdaşlarına rüşvət verdiyini iddia edir.
Antikorrupsiya qurumları saxlanılanlar arasında SBU-nun Dövlətçiliyin Müdafiəsi Departamenti rəhbərinin birinci müavini Sergey Dukanın və Milli Polisin Strateji Araşdırmalar Departamentinin əməkdaşı Vladimir Tsenovun olduğunu bildirib. Məhkəmə hökmü yoxdur.
Zelenski kartelin işinin araşdırılması üçün beynəlxalq tərəfdaşların dəstəyinə ehtiyac olduğunu da deyib. Onun sözlərinə görə, kartel artıq Polşada fəaliyyət göstərir və sintetik narkotiklərlə Almaniya bazarına çıxmağa çalışır, Kiyev bu məsələ ilə bağlı digər ölkələrlə əlaqə saxlayır.