Serbiyada həbs
Serbiyada Cinayət Polisi İdarəsinin rəisi Marko Kriçak və mütəşəkkil cinayətkarlıqla mübarizə bölməsinin komandiri Boşko Sekuloviç vəzifə səlahiyyətlərindən sui-istifadə ittihamı ilə saxlanılıb.
Belqradın baş prokuroru Nenad Stefanoviç bildirib ki, 42 yaşlı Kriçak və Sekuloviç vəzifə borclarını yerinə yetirməməkdə, nəticədə Belqradın keçmiş polis rəisi Veselin Miliçin hüquqlarına ciddi zərər vurmaqda şübhəli bilinirlər.
İttihamlar may ayında Belqraddakı restoranlardan birində baş vermiş qətllə bağlı təhqiqat zamanı ortaya çıxıb. Qətli xəbər verməmək və cinayətkara kömək etmək ittihamı ilə həbsdə olan sabiq rəis Miliç təcridxanada olarkən Kriçak və Sekuloviç barəsində şikayət edərək, onların prokurorluğa qəsdən yalan və natamam sübutlar verdiyini iddia edib.
Al Jazeera qeyd edir ki, Marko Kriçak məğlub olmuş prezident Aleksandar Vuçiçə sadiq fiqur hesab olunur. Tələbə qrupları nümayişlərin yatırılması zamanı Kriçakı qəddarlıqda günahlandırır və onun işdən çıxarılmasını tələb edirdilər.
Baş prokuror Nenad Stefanoviç isə jurnalistlərə açıqlamasında bu həbslərin 25 oktyabrda keçirilmiş parlament seçkiləri ilə heç bir əlaqəsinin olmadığını deyib. Həmin seçkilərdə tələbələrin dəstəklədiyi siyahı qalib gələrək Vuçiçin partiyasının 14 illik hakimiyyətinə son qoyub.
Saxlanılma xəbəri Novi Sad dəmir yolu vağzalında 16 nəfərin ölümü ilə nəticələnən beton talvarın çökməsinin ikinci ildönümünə təsadüf edib. Hadisə ilə bağlı şəhərə toplaşan minlərlə insan qurbanların xatirəsini yad edərək məsuliyyət tələb edib.