Bir sot torpaq 20 min manat
Azərbaycanın bölgələrində torpaq və mənzil qiymətləri sürətlə artır, bəzi rayonlarda bir sot torpaq 15-20 min manata təklif olunur. Azadlıq Radiosunun reportajında Qəbələdə illərdir daşınmaz əmlak alqı-satqısı ilə məşğul olan, adının çəkilməsini istəməyən makler deyir ki, Nohurgöl ətrafında və Vəndamda bir sot torpağa 10-15 min manat, bəzən daha çox qiymət qoyulur: “İşim torpaq satmaqdır, amma bu gün özümə bir balaca həyət yeri almağa belə gücüm çatmır”.
Maklerin sözlərinə görə, Bakıdan gəlib bağ evi tikən imkanlı alıcılar bazarda süni qiymət artımı yaradıb, torpaq sahibləri də onlara arxalanıb satışı gözləyir: “Satıcıya deyirəm ki, bu qiymətə alan yoxdur. Deyir: “Tələsmirəm, qoy qalsın, gələn il daha baha sataram””. O hesab edir ki, nəticədə yerli sakin üçün ev tikmək əlçatmaz olub. Azadlıq Radiosuna görə, bölgədə orta aylıq maaş 683 manatdır.
Azərbaycan Qiymətləndiricilər Palatasının oktyabr təhlilinə görə, bir sot torpağın median təklif qiyməti 16 250 manat olub. Torpaq üzrə qiymət indeksi sentyabrla müqayisədə 2,2 faiz, apreldən bəri isə 21,9 faiz yüksəlib. Yeni tikililərdə bir kvadratmetrin median satış qiyməti 2889 manata çatıb, bu, ötən ilin dekabrı ilə müqayisədə 9,4 faiz çoxdur. Köhnə tikililərdə qiymətlər dekabrdan bəri 6,8 faiz artıb.
Azərbaycan Qiymətləndiricilər Cəmiyyətinin sədri Vüqar Oruc yerli mediaya deyib ki, Naxçıvan, Quba, Qəbələ, Qax, Zaqatala və Balakəndə əvvəllər bir sotu 3-4 min manata təklif olunan torpaq indi 15-20 min manata çatıb, Naxçıvanda isə son beş ildə qiymətlər təxminən 2-2,5 dəfə artıb. O, bahalaşmanı turizm, kənd təsərrüfatı və infrastrukturun inkişafı, Naxçıvanda isə “Zəngəzur dəhlizi” ilə bağlı gözləntilərlə izah edir və 2027-ci ildə iri şəhərlərdə orta hesabla 15 faizədək bahalaşma proqnozlaşdırır.
İqtisadçı Asif İbrahimov isə bahalaşmanı yalnız inkişafla izah etməyi doğru saymır. O, yeni yollar və turizm layihələri ilə torpağa marağın artdığını qəbul etsə də, bəzi rayonlarda qiymətlərin 15-30 min manata çatmasının real iqtisadi vəziyyətə uyğun olmadığını deyir.