Ust-Luqa limanına dron hücumu
Leninqrad vilayətinin qubernatoru Aleksandr Drozdenko bildirib ki, noyabrın 11-nə keçən gecə Ukrayna dronlarının hücumunun hədəfi Kingisepp rayonundakı Ust-Luqa liman zonası olub. “Meduza”nın yazdığına görə, bir neçə dronun düşməsi nəticəsində limanda yanğın başlayıb, üç liman işçisi xəsarət alıb, transformator yarımstansiyası qəza nəticəsində söndürülüb. Qubernatorun sözlərinə görə, vilayət üzərində 150 dron vurulub.
Hücum zamanı Sankt-Peterburqun Pulkovo hava limanı müvəqqəti bağlanıb, İstanbul və Hurqadadan şəhərə uçan sərnişin təyyarələri Helsinkiyə enib. Səhərə qədər Pulkovodan 30 reys gecikib. Gecə Latviya və Litvanın bir neçə rayonunda da hava məkanında mümkün təhlükə barədə xəbərdarlıq elan olunub.
Smolensk vilayətinin qubernatoru Vasili Anoxin isə vilayət üzərində 37 dronun vurulduğunu, Yartsevo şəhərində dron qalıqlarının çoxmərtəbəli yaşayış binasına düşdüyünü bildirib. “İnterfaks”ın yazdığına görə, binada yanğın baş verib, iki nəfər ölüb, 10 nəfər yanğın zonasından xilas edilib, sakinlər təxliyə olunub.
Bir neçə rusiyapərəst hərbi “Telegram” kanalı hücumun dəf edilməsi zamanı Rusiyanın üç vertolyotu itirmiş ola biləcəyini yazıb. DW-nin yazdığına görə, “Voyenniy osvedomitel” kanalı ilkin məlumata istinadla Ka-52 “Alliqator” zərbə vertolyotunun ekipajı ilə birlikdə və Mi-8 vertolyotunun itirildiyini, sonra isə söhbətin üç hava gəmisindən gedə biləcəyini yazıb. Kanal səbəbin ya toqquşma, ya da öz hava hücumundan müdafiə atəşi ola biləcəyini deyib. Başqa bir kanalın iddiasına görə, üç təcrübəli ekipaj, ümumilikdə yeddi hərbçi həlak olub. DW-nin məlumatına görə, Rusiya Müdafiə Nazirliyi bu xəbərlərə hələ münasibət bildirməyib.
Ust-Luqa Baltik dənizində Rusiyanın ən böyük yük limanlarından biridir və neft məhsullarının ixracında mühüm rol oynayır.
Qazaxıstan Energetika Nazirliyinin nümayəndəsi Asel Serikpayeva “İnterfaks-Qazaxıstan” agentliyinə bildirib ki, Qazaxıstan nefti sentyabrdan Ust-Luqa limanı vasitəsilə yüklənmir, bu, “yalnız tranzit boru kəməri sistemi tərəfindəki infrastruktur xarakterli texniki məhdudiyyətlərlə” bağlıdır. Onun sözlərinə görə, buna görə də noyabrın 11-nə keçən gecə limandakı dron hadisəsi Qazaxıstan neftinin ixracına təsir etməyib, planlaşdırılan həcmlər başqa marşrutlarla göndərilir. Nazirlik noyabrın 5-də Rusiya Energetika Nazirliyinə “Drujba” sistemi və Ust-Luqa vasitəsilə nəqlin bərpası üçün müraciət etdiyini açıqlamışdı, nazir Yerlan Akkenjenov noyabrın 10-da Rusiyanın hələ cavab vermədiyini deyib. “KazTransOil” şirkətinin məlumatına görə, yanvar-oktyabrda Ust-Luqa istiqamətinə 1 958 000 ton, Novorossiysk limanına isə 3 723 000 ton Qazaxıstan nefti göndərilib.